Árið 2018 var viðburðaríkt og lærdómsríkt í fjölbreyttum rekstri OR og dótturfyrirtækjanna. Hér er stiklað á helstu viðburðum.
Árið 2018 var viðburðaríkt og lærdómsríkt í fjölbreyttum rekstri OR og dótturfyrirtækjanna. Hér er stiklað á helstu viðburðum.
Betur fer en á horfist þegar eldur kemur upp í þaki Hellisheiðarvirkjunar. Gasleki reynist líkleg orsök. Engin meiðsl verða á fólki en nokkurt tjón á stöðvarhúsinu. Áhrif á orkuvinnslu voru lítil.
Jarðvegsgerlar mælast í neysluvatninu úr Heiðmörk. Engin hætta er á ferðum en viðkvæmum ráðlagt að sjóða vatn. Ástandið varir stutt en gripið er til margvíslegra úrbóta.
Greiðendur skuldabréfs sem OR gaf út í tengslum við sölu á hlut fyrirtækisins í HS Orku árið 2009 greiða bréfið upp. Greiðslan nam um fjórum milljörðum króna og dregur greiðslan úr fjárhagslegri áhættu OR.
Rannsókn sem Veitur gangast fyrir leiðir í ljós lítið magn örplasts í vatninu, en það finnst þó samt. Þetta er fyrsta rannsóknin af þessum toga hér á landi og leiðir til aukinnar umræðu um vandann og þróun aðferða við að meta hann.
OR lokar afgreiðslu fyrir viðskiptavini á Akranesi þar sem rakaskemmdir uppgötvuðust í húsnæðinu við Dalbraut.
Alþjóðlega matsfyrirtækið Fitch hækkar lánshæfiseinkunn OR. Síðar í mánuðinum gerir Moody's það líka.
Ákveðið er að vatnsgjald Veitna lækki hjá flestum vatnsveitum fyrirtækisins. Lækkunin verður 10% í stærstu veitunum – í Reykjavík og á Akranesi – og svo veltur hlutfallið á afkomu hverrar vatnsveitu Veitna.
Bjarni Bjarnason forstjóri greinir frá því í erindi á Vísindadegi OR að rannsóknar- og þróunarverkefni við Hellisheiðarvirkjun, sem fengið hafa milljarða króna í erlenda styrki, hafi sparað fyrirtækjunum í samstæðunni um 13 milljarða króna.
Gagnaveita Reykjavíkur og sveitarfélagið Árborg semja um ljósleiðaravæðingu alls þéttbýlis í sveitarfélaginu.
Orka náttúrunnar opnar hlöðu í Reykjahlíð við Mývatn. Þar með hefur hringvegurinn allur verið varðaður hlöðum.
Gagnaveita Reykjavíkur og Reykjanesbær semja um ljósleiðaravæðingu í bænum.
Í apríl eru haldnar #metoo vinnustofur þar sem allt starfsfólk OR samstæðunnar hittist og ræðir opinskátt um viðfangsefnið; hvernig viljum við hafa þetta og hverju þurfum við að breyta?
Inga Dóra Hrólfsdóttir, framkvæmdastjóri Veitna og Dagur B. Eggertsson borgarstjóri undirrita samning um kaup borgarinnar á tveimur hitaveitutönkum Veitna í Öskjuhlíð. Tankana á að nýta undir náttúrusýningu en nýir verða byggðir í staðinn.
Ný hreinsistöð skólps á Akranesi er tekin í notkun og bætist bærinn þar með í hóp þeirra sveitafélaga sem uppfylla kröfur um skólphreinsun samkvæmt reglugerð.
Gagnaveita Reykjavíkur og sveitarfélagið Vogar semja um ljósleiðaravæðingu í þéttbýli sveitarfélagsins.
Í Borgarnesi er ný hreinsistöð fráveitu Veitna tekin í notkun. Fyrir eru fjórar lífrænar hreinsistöðvar Veitna í uppsveitum Borgarbyggðar, þessa eins víðfeðmasta sveitarfélags landsins.
Orkan opnar tvær afgreiðslustöðvar fyrir vetnisbifreiðar, við Vesturlandsveg í Reykjavík og að Fitjum í Reykjanesbæ. ON mun framleiða vetnið.
Fyrsta úttekt samkvæmt nýjum alþjóðlegum sjálfbærnimatsstaðli fyrir jarðgufuvirkjun í rekstri leiðir í ljós að „Hellisheiðarvirkjun hefur lítil neikvæð áhrif á umhverfi og samfélag og mikilvæg jákvæð félagsleg og hagræn áhrif.“
Gagnaveita Reykjavíkur er meðal stofnenda nýrra alþjóðlegra samtaka ljósleiðarafyrirtækja sem vilja sjá gígabita ljósleiðara alla leið til heimila og fyrirtækja og tryggja valkosti í öflugri fjarskiptaþjónustu.
Hleypt er vatni á nýja rúmlega sjö kílómetra langa aðveituæð Veitna fyrir heitt vatn í Ölfusi og í Þorlákshöfn.
ON semur við alþjóðlega sprotafyrirtækið Algaennovation um aðstöðu og ýmis orkutengd aðföng fyrir ræktun smáþörunga í Jarðhitagarði ON við Hellisheiðarvirkjun.
Ljósleiðari Gagnaveitu Reykjavíkur er tilnefndur til alþjóðlegra verðlauna Carriers World Awards, sem eitt framsæknasta fjarskiptainnviðafyrirtæki í heildsölu.
Eftir að fram koma ásakanir um óréttmæta uppsögn kvenkyns millistjórnanda og karllæga vinnustaðarmenningu hjá OR, stígur Bjarni Bjarnason forstjóri tímabundið til hliðar meðan mál eru skoðuð og úttekt gerð á vinnustaðarmenningunni. Helga Jónsdóttir, lögfræðingur, tekur við á meðan.
Ákveðið er að forstöðumaður fyrirtækjamarkaða ON, Berglind Rán Ólafsdóttir, taki tímabundið við starfi framkvæmdastjóra ON eftir uppsögn Bjarna Más Júlíussonar.
OR ásamt samstarfsaðilum hlýtur ríflega tveggja milljarða króna styrk úr Horizon 2020 Rannsókna- og nýsköpunaráætlun ESB. Styrkurinn er til verkefnisins GECO, sem miðar að sporlausri nýtingu jarðhita.
OR kynnir hugmyndir að breyttu útliti vesturhússins á Bæjarhálsi, sem staðið hefur autt um hríð vegna alvarlegra rakaskemmda.
Í fyrsta skipti hér á landi og trúlega víðar eru hvorttveggja nemi og meistari í rafvirkjanámi konur. Þetta eru starfsmenn ON, þær Aníta Sigurbjörg Emilsdóttir sem fékk sveinsbréf og meistarinn hennar var Kristín Birna Fossdal.
Veitur tilkynna um að bráðlega hefjist lýsing á hluta af því kalda vatni sem höfuðborgarbúar fá úr vatnsbólunum í Heiðmörk. Með því er dregið úr líkum á því að jarðvegsgerlar berist í vatnsveituna.
Orka náttúrunnar opnar nýja hlöðu á Vegamótum á Snæfellsnesi. Er það önnur hlaðan sem ON opnar a Snæfellsnesi en fyrr á árinu var hlaða opnuð í Ólafsvík.
Ljósleiðaravæðingu Kópavogs lýkur og öllum íbúum í þéttbýli Kópavogs stendur nú til boða Eitt gíg netsamband um Ljósleiðarann.
ON og gagnaversfyrirtækið Etix Everywhere Borealis skrifa undir samning um rafmagnsviðskipti vegna uppbyggingar á gagnaverum á Blönduósi og á höfuðborgarsvæðinu.
Niðurstaða úttektar innri endurskoðunar á starfsmannamálum og vinnustaðarmenningu OR er kynnt á blaðamannafundi. Vinnustaðarmenning hjá Orkuveitu Reykjavíkur og dótturfyrirtækjum er betri en gengur og gerist á íslenskum vinnumarkaði og uppsagnir tveggja stjórnenda eru taldar réttmætar.
Stjórn OR samþykkir að ráðast í útbætur í samræmi við ábendingar í úttekt innri endurskoðunar í vinnustaðarmálum. Bjarni Bjarnason snýr aftur í forstjórastólinn.
Orka náttúrunnar tekur fimmtugustu hlöðu fyrirtækisins í notkun við Geysi í Haukadal. Mikilvægt skref fyrir ferðaþjónustuna, segir Berglind Rán framkvæmdastjóri ON.
